Nu Leh Pa

                                            Nu Leh Pa

• Kanu nawitui bawngnawi leh khuaizu sangin khum zaw a,
  

Kapa baan in sikkhuam sangin muanhuai zaw!

• Kanu tawh zingsang biakinn thungen kapai, vangam pai tawh ka kibang a,
  

Kapa tawh zinglo kuan in kapai uh mopawi pai sangin nuam sa zaw ing!

• Kanu nau-awih la-in la khempeuh lak ah ngaih pen a,
  

Kapa zola awih mah zaknop pen sa’ng!

• Kanu hongmuat an mah andang khempeuh sang’ ka thadim zaw a,
  

Kapa hongpiak tui mah ka dangtaak pha pen!

• Kanu khawhsa ankung mah kitawh baih pen a,

Kapa lamsa inn mah leitung ah muanhuai sa pen ingh!

• Kanu tangthu gen mah zaknop kasa pen a,
  

Kapa ciamnuih gen mah ka nuihza pen!

• Kanu mah leitung ah lungduai kasa pen a,
  

Kapa mah leitung ah ciampeel ngei kei sa pen ingh!

• Kanu nungzang a ka ihmut mah ka ihmut nuam pen a,
  

Kapa baan lukhap in kazat mah lungnuam in ihmu thei pen ingh!

• Kanu tawh biakinn sung a ka tutkhop mah ka kilawm pen a,
  

Kapa tawh ankuan ka-uum khop mah ka ankam liim pen!

• Kanu tawh ka tonkhop mah vangnei ka kisa pen a,
  

Kapa tawh sing ka-at khop mah ka tawldam pen!

• Kanu ong hilh thute mah thutang pen a,
  

Kapa kagei a hong om pen kumpi huangsung kaom sangin ka lungmuang zaw!

• Kanu zatzat tu mah zatnuam kasa pen a,
  

Kapa seek kawngtem mah hiam tawntung pen!

• Kanu hong leisak puan mah silhnuam in ka kilawm pen a,
  

Kapa hong bawlsak gua-phel mah tawh vasa tam man pen ingh!

• Kanu hong thu ngetsakna mah lawhcing pen a,

Kapa hong deihsakna mah lian pen sa ingh!

• Kanu hong phahsak dekphah tung mah ah ka mang hoih pen a,

Kapa suihsa tuangdung tung mah tutna in nuamsa pen ing!

• Kanu hong gatsak puanbu sangin a lumzaw puanza a omnai kei a,

Kapa hong khuisak thongkuah sangin a to zaw om kei!

• Kanu sam sangin a hoih zaw sam ka mu nai kei a,
  

Kapa ha sangin a paak zaw hatangh mu nai kengh!

• Kanu sangin a citak zaw ding numei kamu nai kei a,

Kapa sangin a migi zaw ding pasal mu zo kengh!

• Kanu hong sapna aw in aw khempeuh lak ah khum pen a,

Kapa hong gen thute suang mangpha sangin mangpha zaw!

• Kanu maitangh in numei mai khempeuh lak ah it huai penpen a,
  

Kapa thapuak in pasal dangte tha sangin muanhuai zaw!

• Kanu hong satna in ka lungsim hong satkha pen a,

Kapa hong totna in hong kikhel sak pen!

• Kanu leh Kapa hongguat Lukhu mah leitung ah manpha penpen sa’ng!

By,
Pau Khan Kap
29April 2011

Note: Ta te a it Nu leh Pa khempeuh hih ka laigelh tawh ong pahtawi ingh!